Blader door transcripties » Lokale Kronieken uit de Nederlanden 1500-1850

archieftoegang 1499_Rott_Jans, pagina 55

47
om Warvic te keeren, dat hij in Ingelant niet comen en soude, off hem te wachten ende te vangen9. Maer die grave van Warvic makedet ymmer also mitten coninc van Vranckerijc ende mitten jonge coninc Heinricx zoon, die acht jaer mit sijn moeder verdreven hadde geweest van Warvic, want Warvic coninc Heinric, vader van den voirseiden jonge voertijts gevangen hadde, also voirscreven staet.
Ende ymmers makede hijt also mitten coninc van Vranckerijc, dat hij scepinge ende volc creech van den coninc van Vranckerijc, daermede dat hij wederovervoer in Ingelant10. Men seide dat die jonge Heinricx zoon ende sijn moeder mede overvoeren11. Ende als dese grave van Warvic aldus over quam in Ingelant zo riep dat gemeen volc al ‘Warvic’. Ende hij versamende een grote menichte van volke ende quam tot coninc Eduwaerts toe. Coninc Eduwaert, dit vernemende, vergaerde oick veel volcx ende quam mit sijnen volke na Warvic toe. Ende onder all hadde den coninc bij hem een brueder van desen Warvic12, ende was bij den coninc een groot capitein ende hadde veel volcx onder hem. Ende als den coninc meynde jegens Waervic toe te gaen om hem te bevechten, zoe streec Warvix brueder van den coninc over tot Warvic sijnen brueder mit alle sijnen volke, ende ander heeren ghingen oick over tot Warvic mit hoeren volke, also dat den coninc Eduwaert int laetste ommesach ende vant hemselven alleen mit een cleyn menichte van volke. Ende alle paden waren beset om hem te vangen off doot te slaen, alsoe dat den coninc, overmits tlijf te behouden, vloet ende reet eenen wech die men niet gewone en was te rijden mitten luert Scaels13 ende andere die hij bij hem [f. 266v] hadde; ende en mochte in Lonnen niet comen, maer hij reet tot Lynnen14 ende daer vant hij eenen hulc van Bergen upten Zoem15 ende ander scepen die daer lagen, ende slogen hoer paerden voer thoeft ende ghingen tscepe16. Ende quamen geseilt