Blader door transcripties » Lokale Kronieken uit de Nederlanden 1500-1850

archieftoegang 1499_Rott_Jans, pagina 48

[f. 264] Ende die van Ludic stonden doe weder up jegens mijn heere van Bourgoengen, ende den coninc coninck van Vranckerijc, die jegens mijn heere was ende te velde lach mit sijn volc, ende doen hij verenicht was mit mijn heere toech hij mit mijn heere van Bourgoengen mit sijn volc voer Ludic, ende belagen die stad omtrent achte dagen70. Ende voer Ludic liggende quamen die Lukenaers uut snachs mit subtylhede ende vernamen dat sein van des conincx ende van mijns heeren heer, ende quamen mitten selven seine also na mijns heren tente, dat sij daer worden vechtende ende vele heeren ende andere personen dootslogen71. Ende maicten sulken gerufte in den heere dat den coninc van Vranckerijc mit sijn volc all riepen: Bourgoengen, Bourgoengen! Ende terstont toech mijn heere craftelic mitten coninc in die stadt ende wan se craftelic, ende sij slogent in der hitten all doot dat in de stad was van mannen, wijven ende kinderen, ende worpender vele in de Mase, die verdroncken, ende slechteden poorten ende muyeren ende tmeerredeel van den huyssen, die in de stad stonden, tot niet ende totten gronde toe.
Van der huldinge shertogen van Bourgoengen, die was in den Hage gehult upten XXIen dach van julio int jaer [M IIIIC] LXVIII72.
Item. Doen mijn heere van Bourgoengen Kaerle, hertooch Philippus zoon, Ludic, Dinant ende all dit ingewonnen hadde doen quam hij in Brabant ende in Vlaenderen, ende daer begeerde hij groote scattinge van den lande, ende gaven hem up jaren te betalen zo groot gelt dat iicx up dees tijt niet en weet te bescrijven73. Ende daernae quam hij in Hollant, daer wart hij gehult in den Hage upten XXIen dach in julio anno LXVIII, daer hem die gedeputeerde van