Blader door transcripties » Lokale Kronieken uit de Nederlanden 1500-1850

archieftoegang 1558_Bosc_Cupe, pagina 26

Inden iare ons Heeren dusent ccc en. lvj werden ten Bosch als in een hooftstat van Braband ontfangen en. gehult als hartoge en. hartoginne van Brabant, hartoge Wenzel en. vrou Ianne, daer zy oock hooclyck besconken waren vander stat, ende op die tyt gaf vrou Ianne als hartoginne die stat vanden Bosch, dat sy mogen vueren inder stat wapene iiij leewen mitten boome, dat welcke die ander steden van Brabant niet en hebben, ende doe die charte van incompste gegeven ende verleent.
Van dat clarisse clooster binnen Tsertogenbosch.
Dat clooster van sinte Clara binnen der stat vanden Bosch is te voren geweest een borchte ofte een casteel, toebehoorende een rycke en. treffelick ioncker, genamt ioncker Geerlinck vanden Bosch, wiens gehoechnis noch onder hout die steenen brug, die over die Diese leet en. is geheiten die Geerlinxse brug, en. dese ioncker Geerlinck is gestorven sonder wettige geboort after te laten, ende soo quam dat slot op synen brueder, ioncker Ian van Hoorn, die op die tyt woonde in die huysinge, daer nu die verwer woont, tegen die Schilders poorte over, ende dese ioncker Ian van Huerne heeft van dat slot en. de huysinge gemaect een iouffrau clooster van Clarissen, assigneerende groote renten en. gueden om dat clooster te onderhouden.
Int iaer ons Heeren dusent ccc lix op sinte Matheus dach is dat convent vanden Clarissen eerst begonnen en. is geworden een scerpe besloten clooster, ende die eerste Clarissen van dit convent waren gecomen wt dat Clarisse clooster tot Brussel.
In dese iare maecten die stat vanden Bosch en. die van Loven een aliancie en. een minlyck accoort, gelovende malcanderen by te staen en. behulpich te wesen myt live en. goet in allen noot saken en. wat den eenen of den anderen over quaem.
Op dese tyt woonden tot Tsertogenbosch een borger genaemt Adam van Mierd, die welcke een scriver was in die scryff camer, ende daer na werdt hy secretaris vander stat, en. hy werdt alsoo ryck, dat hy en. syn huysvrou elck een gasthuys fundeerde: dat manne gasthuys, dat hy fundeerde, was genaemt her Daems gasthuys by sinte Barbere cappelle en. nu staet in die Schilders straet over die Geerlinxe brug: ende dat gasthuys van die vrouwen staet by der heeren kelder op die Papen huls. Daer nae als die vrouwe gestorven was, soo werdt dese Dame prister en. wert pastoor van sint Ians kerck, en. doen arbeyden hy alsoo lang mit groote costen, dat in sint Ians kerck een collegie en. canonizye quam, daer hy eerste deken was.
In desen iaere werdt gefundeert in sint Ians kercke die canonizie van xxx canoniken, mids toedoen en. solicitacie van heer Adam van Mierd, doen pastoor vander kercken; ende heer Ian van Arckel, biscop van Luyck, scelde den canoniken quyt alle recht en. iurisdictie, die hy tot die canonizie hadde en. maectese exempt, en. aldus staen die canoniken onder den paeus van Roomen sonder middel.