Blader door transcripties » Lokale Kronieken uit de Nederlanden 1500-1850

archieftoegang 1666_Gent_Bill_01, pagina 191

selve quam ligghen tot Everghem om Ghendt te belegheren.
Anno
1489
Int Schependom van Jor. Loijs van Massime, wiert
den vloer gheleijt van de Thorrepoorte, dat alsdan
een seer stercke dobbel poorte was, ende eene vande
Principaelste van de aude poorten van Ghendt.
In den selven tijde soo wasser binnen de stadt van
Ghendt, ende in den Vrijdom van diere, alsulck
een groote contagieuse sieckte dat men bevint bij
schriftelicke Memorie dat de selve wel 39 ofte
40000 menschen in de aerde sleipte. Godt wilt
ons behoeden van een ghelijcke straffe.
1489
Soo wiert ghemaeckt den generaelen Paijs tusschen de
vier Coninghen, Charles den VIIIen.van Vranckrijcke,
Ferdinandt van Spaignen, en Aragon, Maxn Co:
der Romeijnen, ende Heijndrick den VIIen van Inghelandt,
daer over alomme een groote blijtschaep was sonderlick
in Vlaendren.
1490
Soo nam Maxn Co: der Romeijnen Possessie van alle
sijne erflanden van Oostenrijck, ende andere daer
rontdom
179.
rontdom gheleghen.
Anno
1490
Soo waeren die van Brugghe door hunne eijghen onvoor¬
sichticheijt, oppiniatricheijt, ende oneenicheijt in een
groote miserie ende allendicheijt sonder Coophandel,
Neeringhe, ofte voorsien van noodelick vivers, maer
ter contrarie, door dien sij besloten, ende alf beleghert
te water ende te lande waeren, hadden sij ghebreck
van alles, sonder dat die van Ghendt (die sij voor
hun beste vrienden hielden) wilden ofte costen
van eenighe quantiteijt graenen secoureren, soo dat
die van Brugghe groot ghebreck leeden, ende die
van Ghendt ende waeren niet seer weeildich.
1491
Sijnde ghestorven den Paus Innocentius den VIIIen, soo
wiert in sijn plaetse vercoren Alexander den VIen
1491
Soo wiert gheboren Henricus den 8en Co: van Inghelandt
die hier naer soo groote veranderinghe bracht in de Religie.
1491
Soo sonden die van Denremonde an die van de stadt
van Ghendt, op dat sij hun souden senden ghedeputeerde,
ende