Blader door transcripties » Lokale Kronieken uit de Nederlanden 1500-1850

archieftoegang 1666_Gent_Bill_01, pagina 172

langhe duerde, want hij verweet hunlieden alle de
mishusen, faulten, ende misdaden, die sij teghens hem
teghens sijn Onderdaenen, ende teghens sijne Landen
hadden ghedaen, segghende, ick beminne u wel,
maer en ontsie u niet met veel meer andere scherpe
reprochien, die seer droeve waeren om hooren, ende ten
lesten naer dat hertoch Caerle sijn redenen al uijtgheseijt
hadde, soo baden de voorseijde Dekenen van Ghendt oodt¬
moedelick om sijne gratie, die hemlieden van hem
met sijnen Paijs wiert gheconsenteert, ende stelde
de selve wederom om den rechten wech van ghehoor¬
saemheijt, Justicie, ende Pollicije door veel goede, ende
vriendelicke vermaninghen (die heel anders waeren, als
de scherpe, straffe, ende bittere worden, die hij hun
int eerste ghegheven hadde) in de maniere hoe dat
hij nu voortdan wilde, ende begheerde sijne stadt van
Ghendt gheregiert te hebben.
Anno
1469
Soo dede hertoch Caerle met vrau Margriete sijn
huijsvrauwe sijn blijde Incomste binnen Ghendt, comende
van Ipre, ende Cortrijcke, door de Petercelle poorte,
van waer de straeten op beijde de zijden behanghen waeren
met baeijen van sijn colleuren tot int Princen hof.
Ende
160.
Ende besedt met brandende Tortsen, die naer gissinghe
wel ontrent de 9000 in ghetalle waeren. De verthooningen
spelen van Rethorijck, Arcken, en Poorten van Triumphe
waeren al seer constich, ende costelick, ende alle
andere dinghen naer advenandt. De tractamenten
van bancquetten, ende maeltijden waeren oock seer
somptueux ende manificq, hoe wel datter daghelicx
bij duijsende monden te spijsen waeren, soo dat de stadt
van Ghendt al dede wat sij coste ofte mochte om
haere hoocheden wel te tracteren, te caresceren, ende
te contenteren. Van Ghendt vertrocken haere hoocheden
naer de stadt van Brugghe, alwaer sij oock seer
eerlick, ende blijdelick wierden ontfanghen.
Anno
1469
Soo cocht hertoch Caerle van den broeder van den
Aertshertoghe van Oostenrijck, een rijck, ende wel
gheleghen Graefschaep gheseijt van Ferrette met
veel steden ende sloten, het welcke Graefschaep was
ligghende, ende palende ant Graefschaep van Elsatien,
alsmede an den Rhijn, ende de pennijnghen van desen
coop waeren tot Brugghe ghetelt an den Heere Thomas
de Poortenaere.
1469
Soo vertrock hertoch Caerle met goede gheselschaepe,
ende