Blader door transcripties » Lokale Kronieken uit de Nederlanden 1500-1850

archieftoegang 1580_Antw_Wese, pagina 35

34
Verdroncken sij by hoopen
Arenborchs peert viel in een sloot
Dies moest hijt oyck becoopen
Thooft de zijde Den hals waren Deurwont
Dies hijt bestorff In corter stont
Ende Groesbeeck Ist ontloopen
Van Dit volck men begraven sach
Over De Duysent achthondert
Wat men noch vondt naer desen Dach
Dat sij hier vuyt gesondert
Nassouwens volck die Doot bleven Daer
Waeren gheen veertich Dat Is waer
In Godes werck u wondert
Doch Graeff Adolf seer onversaecht
Is Daer oyck Doot bleven
Grave Lodowyckx Cancelier wel begaeft
Die liet Daer oijck sijn leven
Veel syn gewont Die stonden stijff
Toch hebben meest gheen noot van tlyff
God wil haer sterckte gheven
Twee hondert dertich Duijtschen cloeck
Hier oyck gevangen lagen
Arenborch hadde gedaen tversoeck
Om menich munnicx waghen
Wel voll van cruyt clooten broot en wijn
Dees meest al bleven sijn
35
Elck peert wert vuijt geslagen
Tgeschut ut. re. mi. fa. sol. la.
Vuyt Groeninghen ses stucken
die volgen nu Graeff Lodowyck naer
De heere laet toch gelucken
dat Die vijanden van syn woort
Als Dese corts worden versmoort
Die noch vrome verdrucken
Datmen den mensche die saeck niet toe en scrijft
den mensche want het waer geloghen
Want het Is God Die de selfde Drijft
Al heeft hij langhe vertoghen
Sulck was wel onser sonden schult
Ende den tyt en was noch nijet vervult
Maer Is in syne vermoghen
Prince
O heere u sij loff en Danck
Van u over winnen
Sterckt ons gemoet noch zwack en cranck
Met Den gheest van binnen
Dat het bidt en betrouwet vast
Soo sult ghij corts van overlast
Helpen Die u beminnen FINIS
Den xijen No¬
vembris Anno
1568
Memorie vanden Capiteijnen ende heeren gebleven
Inde schermutsinghe gebuert een vrijdage Den xijen Dach
Novembris 1568 In Doptrecken vanden leger vanden
Prince van Oraengien bij quesnoij omtrent ix uren