Blader door transcripties » Lokale Kronieken uit de Nederlanden 1500-1850

archieftoegang 1580_Antw_Wese, pagina 184

320
tot het vergaderen op Den peijs tot Cuelen
Opden 7en
Maij 1579
Heeft De geheele gemeynte alhier elck nae syne
staet ende goetwillige leeninge van gelde gedaen
om geemploijeert te worden tot ontsetten van
Maestricht, vuyt gebracht hebbende De selve
leenige wel omtrent [...]
Opten xxvien
ende xxvijen
Maij wessende
Sijn De soldaten van hier omtrent vertrocken
nae het quartier van Hoochstraten ende Breda,
alwaer sij waren versamelende bij onse Ruyters
omme Maestricht te gaen secoureren
Opten xxvijen
Maij
Is hier De tydinge comen Dat De Malecontenten
In Vlaenderen grootelyck met volcke waeren
versterckt ende Dat Die van Rijsele tot noch
toe gesimuleert hebbende hen hadden met De
Malecontenten geveucht hebbende Diversche
persoonen Dat goede patriotten waren Doen vuyter
stadt gaen met vrouwen ende kinderen bynnen
Drije uren
Opten xxviij
Maij wesende
assensionis dach
Heeft alhier in Stadt groot gerucht ende alarme
geweest, vuyt oirsaken Dat De Catholycke op
gerecht hadden een groote generale processie van
alle Cloosters ende kercken ende vande Den meesten¬
deel vande Catholycke Borgers ende oyck van
Hertooch Matthias met syn hoff, welcke
processie generael syn vuyt onse lieve vrouwe
kercke
321
kercke meijnde ende wilden Celebreren nijettegenstaende
Dat eenige Coronnellen sdaechs te voren ende oyck eenighe
andere ten selven Daghe hen hadden versocht ende geadver¬
teert Dat sy De zelve processie generale buyten Der
kercken niet gaen en souden op Dat Daer Deur gheen
Inconvenient en geschiede, gelyck oijck gebeurt is, want
omtrent Den Noene alsoe De voerß Processie begonst te
gaene wesende omtrent het Muelegat, hebbende eenighe
Borgers vande Religie Die met hen geweer aldaer waren
staende verboden Dat sy nijet passeren ende geseegt Dat zij
wederomme trecken souden ende alsoe sij te rugge keerende
eenige vande Catholicque als Borgers ende Italianen hebben
meynen ende gedreycht met hen blooten Rappieren omme
te passeren tegens De andere borgers omtrent het Muelegat
ende elders staende ende loose schueten schietende, Soe is ten
lesten het gerucht noch groot gewordden, ende hebben De
Borgers vande Religien met scherp geschoten soe Datter twee
Doot bleven sijn ende eenige gequest soe Dat De Processie met
groote gerucht wederomme ter kercken met heure Tortsen In¬
gedremsts vallende over hoop Deen over Danderen, ende terstont
hebbe Die vande Religien met meer andere borgers aldaer hen
vendels comende De kercke omcingelt met allent volck Dat
Daer Inne was, ende De geheele Stadt is voorts in wapen
geloopen ende en hebben nyet opgehouden voor alle de geeste¬
lyckheyt Inde voirß kercke wesende (met oyck Den ghenen
Die sij van andere plaetsen Der stadt Daer toe gebrocht hebben)
en Syn ten selven Daghe vuyter Stadt geleydt geweest, op
sekere schepen De welcke wirdden byden Viceadmirael opt
schelt bewaert soe Canonicken Prochianen Cappellaenen