Blader door transcripties » Het Utrechts Archief

archieftoegang 34-4, inventarisnummer 136, pagina 5

Op huyden een sesten dach januarij ouden styls des jaers xvjc ses ende twintich Compareerde voor mij Willem van Galen Openbaer nots. bij den E. Hove Provintiael t Vtrecht geadmitteert Int by wesen der naebenoemde getuygen Jouffe mechtelt van huyckersloot weduwe wylen Joncheers Johan van Ruijtenberch mij notario bekent Ende verclaerde, egheene andere goederen in eygendomme thebben ende possideren als d'ghenaebescreven, eerstel. drie bedden, een ledicant bijde maechden van Jouffe. Adriani van Ruijtenberch haers comparantes dochtere beslapen worden, een paer gardynen van roodt ende geil, eene eycken schabelle twee cleyne schabellekens, een slaepbant een eetens kasgen, twee off drie oude kistgens twaelff tinne schottelen, een dasijn telloiren, acht ofte negen soo witte als roode aerde kannen mit tinne leeden, een bed pan, vyff ofte ses sithstoelen, twee taeffeltgens een glasen kasgen, drie cooperen keteltgens, ende drie sith cussens met wapens zonder meer, verclarende mede zy comparante, d'goederen haer doorde overlyden van Joaff. Elisabeth van Rutenbert hare dochtere aengecomen, als gifte onder den levende gegeven thebben aen Jouffr. Maria van Ruijsen mede haers comparantes dochtere, ende ten eynde nae haers comparantes overlyden onder hare kynderen, nopende d'kennisse haerder goederen gheene questie en verryse nemaer alle lieffde ende eenicheyt gehouden worden soo versochte zy comparante vande voors hare verclaringe acte ende is desen Aldus gedaen ende gepasseert thuerder woonstede Inde nieuwstrate binnen Utrecht ter presentien vande Eersame Anthonis van drykercken ende Aert Amelisz beyde borgers deser stede als getuijgen hier toe special. mechtelt van huijkeslodt intho van wykercken Aert Melisz W. Van Galen