Blader door transcripties » Stadsarchief Amsterdam

archieftoegang 5075, inventarisnummer 173, pagina 23

In den name onsheeren amen Inden Jaere vander
geboorten desselffs ons heeren ende salichmaec
kers Jhesu christij duysent vyff hondert negen
ende tnegentich Indictione duodecima opten
sessentwintichsten October naemiddaechs
die clocke omtrent drie uren Impererende
die hoochgeboorenste ende grootmachtichste
forste ende heere rudolpho byder gratien
Godts, die tweede roemse kayser vandier
naem altyt vermeerder srycx, int drieentwintichste
Jaer synre keyselycke electie syn ter presentie
van my nots. publ. ende den getuygen naegenomt
in eygener persoonen gestelt Pieter Janssz
scheepstimmerman ende Ael Jans dr syne
wettige huysvrouwe poorter ende poorteresse
der stede Aemstelredamme woonende op
Ulenburch my nots. onbekendt maer den naebe¬
schreven getuyge soo sy expres verclaerde
seer wel bekendt synde die voorn. pieter
Janssz met ons opter aerden gaende ende
staende ende die voorss. Ael Jans dr hoe
wel beroert ende sieckelyck van lichaem
synde nochtans beyde haer vyff sinnen redene
ende verstandt wel machtich ende volcommel.
gebruyckende alst uterlyck bleeck ende scheen
die welck Innesiende des menschen cranckheyt
ende broosheyt die seeckerheyt des doots ende d'onseeckere
ure vandien begeerde d'selve mits testamentel.
dispositie te prevenieren hebben inder bester forme
ende nae style van rechte met vryen ombedwongen
wille soo sy seyden gedisponeert over haer testament
ende uterste wille in manieren naevolgende inden
eersten bevelende haere sielen inde handen
begraeffenisse
ende barmherticheyt Godts almachtich ende
haere lichaemen der Christelycke hebben
voorts die testateurs voorn. wt sonderlinge
echtelycke lieffde gunst ende goede affectie
die sy malcanderen toedraegen als oock
omme meer andere deuchdelycke redenen haer
beyder moet ende conscientie daer toe moverende
geordonneert gemaect ende gewilt ordonneren
23
maecken ende willen mits desen dat die lancxtle¬
vende van hen beyden (die Godt almachtich
alleene bekendt is) eeuwelyck ende erffelyck
sal hebben behouden ende genieten alle ende
yegelycke die goederen soo roerende als onroerende
renten actien crediten ende alles wes d'eerst
afflijvige van hen beyden metter doot ontruymen
ende achterlaeten sall eegene wtgesondert den
selven lancxtlevende Jure Institutionis
met vollen rechten van Institutien daerinne
tot syn oft haer universele eerffgenaem mits
desen Institueerende Behoudelyck dat die
lancxtlevende van hen beyden gehouden sall
wesen naert overlyde vanden eerst afflivige
aen desselffs bloet vrienden wt te keeren ende te
laeten volgen die clederen van linnen ende
wollen tot desselffs eerst afflyvigens lyve
behoort hebbende ende boven dien vyfftich guldens
aen gelt Alle die welcke seyden die testateurs
ende elcx van hen te wesen haer beyder testament
uterste ende laetste wille twelck sy wilden dat
alsulcx oft als codicille gifte ter cause des doots
onder den levenden oft anders soo een yeder
testament ende uterste willen alder vaste
ende crachtichste plaets houden ende subsisteren
sal moegen van goeder waerden gehouden te
hebben ende volcommen effect te sullen sorteren
vanden minsten totten meeste article toe
daer inne begrepen niet tegenstaende eenige
keuren oft Ordonnantien van landen
oft steden desen contrarierende versouckende
voorts aen my notario naegenoembt wettel.
stipulerende van tgene voorss. is gemaeckt ende
henlieden gelevert te werden een of meer
Openbaer acten oft Instrumenten in
debita forma Gedaen binnen der voorss. stede
van Aemstelredamme ten huyse vande
testateurs ter presentie van Franck claessz
ende willem Cornelissz scheepstimmerluyden die desen
inden ge registre myns nots. onderteeckent hebben
als getuygen hier toe versocht ende gebeden