Blader door transcripties » Stadsarchief Amsterdam

archieftoegang 342, inventarisnummer 7, pagina 5

Item Jan Damez smyt heft besproken dat huus


by de zyeken myt dat ynboel dat hy after
laten sal na sin doet dese nabescreven: die Nvwe
Kerc, de Husytten ende dat Oude Gasthuus.
Item Jacop Claesz to Diemen heft dat Oude


Gasthuus besproken ende Sinte Peters Gasthuus xvii
R gul onder hem beyden in sin testamet to
Diemen. Bet by Albert Otsoen iii½ R gul,
rest ons viii R gul, hoert Synte Peters Gasthuus


half. 
Item Jacop Vrerycxz wyf heft besproken die Nvwe


Kerc ende die Huussitte ende dat Oude
Gasthuus. Die helft van den huus ende ynboel
daer sy in ghestoruen is die kerc voirs. de
helft, de ander helft die hussytten meester
ende dat Oude Gasthuus die ander helft. 
Item so hebben de kercmeester, hussittemeesters
ende gasthuus meesters myt Jacop Vrerycz
ouer een ghedraghen dat Jacop Vrerycz
sal dit voirs. huus myt dat ynboel bewaren
ende ghebruken syn leuen, tenden siin doet
salt alheel comen an de kerc, Gasthuus ende
Hussitten voirs. elc hoer dernel.
Item Jacop Vrerycz wyff ende Jacop Vrerycz
hebben to samen ghemaect ende besproken na
hoere beyder doet hoer huus myt dat ynboel
de Nvwee Kerc, de Hussitten ende dat Oude
Gasthuus elc dat dernel euen veel.
Item Jan Woutersz ter Ouder kerc heft ons besproken
anno lxxii vi R gul an land ende is
ende leyt in Jan Woutersz syn vaders lant by
Stockelyngher bruug ende ic ver moed dattet Jan
Woutersz syn vader bruucket ende dese selfde
Jan Woutersz voers., die doet is, had een wyf
ende heet Ael Taems die noppster ende dat scynt
na haer eyghen woerd dat sy dit voirs. lant
vercoft heft. Aldus moet ment opsporen hoet onse
dese zaeck is. So heb wy Jan Woutersz voer recht
gehat ende dat is gewyst dat hy ons borch voer dit lb gt
voirs. setten sal. So heft hy ons borch geset voer dit lb gt
synz, die Claes van Rarops dochter hefft in de Kercstraet
alder naest Peter Kroex huus ende syn naem is Peter
Janz Den dach to Heylighemys anno lxxiiii ontfangen i lb gt.
Item Phls oly slagher heft ons ii R gul besproken. Bet.
Item anno lxxv Onse Vrou to Lychtmys so heb ic Claes
Stoter Romer onse byer betaelt ende wyl bezyen hoe veel
byers dat wy van dit jaer besygen sellen, behaluen
xxviii stycke byers dye daer van outs staen, die hyt
Gasthuus in testament gegeuen hefft.
Item Lys Harsten heft dat Oude Gasthuus gegeuen i croen
tsaers op Lam van Vlimens ramen. Dese croen heb wy
vercoft ende Lys Harsten heft dese voirs. croen jaerlix gegeuen
om den armen zyecken een tsaers om to copen wyn ende
ghebraen, also vard alste croen streckt; nvt vercoft is nv
sullet die gasthuus meesters bewaren van dat Gasthuus gelt.
Des croen heb wy Claes van Vlimen vercoft.