Blader door transcripties » Stadsarchief Amsterdam

archieftoegang 342, inventarisnummer 5, pagina 7

Item Jacob Truden zoen die heeft besproken den gasthuse
een vierendeel van enen huse ende erue dat ghelegen is
in der Caluerstrate alder naist Jacob Dobben ende
Jan die Langhe nv ter tijt bewoent ende in pachte heeft
om drie pont twalef scellinge ende twee pennynge
siaers Te betalen die een helfte tot meye ende die ander
helfte tot Heylighemisse Ende van desen voirnoemden
renten selmen gheuen den armen alsoe veel schoene
alsmen coepen mach om die tweedeel van enen
ouden Vrancixen scilt na Heylighe misse als die
rente inghecomen zijn dair zij menen dattet best
an bestaedt is
Hier af zel men
jairlixe gheuen
den armen an scoen
die tweedeel van
enen ouden Vranc
rijxen scilt
Item Gherijt Claes soen van Wermer ende Aue zijn wijf
hebben besproken den gasthuse van Heylighen Gheest
achte scellinge siaers op dat huus ende erue dair
Jan Brechten zoen nv in woent ewelic bliuende ende
niet te vercoepen Te betalen tot meye
Item Heyntgijn moelnaer heeft besproken int jair
van tachtighen achte groet siaers ewelike staende
op zijn huus ende erue bider Heyliger Stede ende
niet te vercopen dair die vier groet van Onser
Vrouwen capelle gecoft worden den Vrancrijxen
scilt voir viertich groet gherekent Te betalen alle
jair tot Heylighemisse
Item Vrancke Dirc Vrancken soens soen heeft be
sproken den gasthuse viertien groet jairlixe ren
ten an comans ghelde die staen op een erue
ouer die grafte alder naiste Claes Hermans soens
erue ende Albert Claes soen in pachte hout van den
gasthuse in deser manieren dat men dese renten
oirbaren sel ter tymmeringhe Ende alsmen niet
en tymmert soe sel men dair turf mede coepen
ende verbernen ende vermeerren dat bier voir int
gasthuus alsoe alst Dirc Katherinen soen bespro
ken heeft te betalen tot meye
Item ghecoft jeghens Nyesen Dirc Willems soens derdaluen
Vrancrijxen scilt siaers op huus ende erue dat Gherijt die
Vroeden kinder toebehoert ende ghelegen is opten Mid
deldamme alder naist Herman Jacobs soens erue te betalen
die een helfte tot Heylighemisse ende die ander helfte tot
meye

Item Vrederic Pont die heeft besproken den gasthuse
twee pont Hollans an coemans ghelde tot eenre lampe
mede te bernen alle nacht voir die sieken tot ewighen
daghen. die welke staen sullen op huus ende erue ghele
ghen in die Nye Kercsteghe ende dat kerchof of vermeer
ret is Ende die kercmeesters sellen die twee pont
siaers wtreyken tot des gasthuus behoef als van den
huse ende erue dair meester Willem die Sael in woent
tot Heylighemisse