Blader door transcripties » Stadsarchief Amsterdam

archieftoegang 195, inventarisnummer 608, pagina 2

te
Inden waire des heeren Amen Inden Jare vander geboorte des seluen onsen heeren duysent vyfhondert negen ende tachtich der tweeder indictie, opten achtienden dach
in januario omtrent een uren naeden noene int derthiende jare vanden keyserrycke des alder deurluchtichsten fursten ende heeren Rudolph deur goods genaden
de tweede Roomsche keysere van dier name altyt dricx vermeerdere Compareerden voor my openbaer notaris ende den getugen naegenoempt Deersamen
Egbert roeloffs ende oudt burgermeester der Stede van Amstelredamme ende Anna cornelis zijn wettige huysfrouwe gaende staende ende hooren verstant wel
hebbende soot claerlyck bleeck willende donseeckere ure des doots voorcomen hebben alvoors gerevoceert ende wedergeroepen revoceren ende wederroepen
mits des alsulcken maeckinge ende dispositie testamentaire als opten VIIen dach in martio anno vierensestich voor wylen Dirck Woutersz als opende
notaris ende zeeckere getugen gemaect ende gepasseert hebben gehadt willende dat de selue maeckinge van voort aen doot ende te niete sal wesen
hebben voorts omme sonderlinge redenen hooren moet ende conscien daer toe soe zij zeyden moverende byde beste maniere stile ende rechte soe zy dat
best ende vastelicx doen souden conden ende mochten hooren testamente ende vuyterste wille gemaect geordonnet ende gedisponeert in manieren naervolgen
ende eerst beuelende God almachtich hoore zielen ende hoer doode lichamen der christelycke begrauinge hebben de voors testateurs gemaect
geordonnet ende gewilt maecken ordonneren ende willen mits des dat de lancxtlevende van hen beyden hebben ende behouden sal den geheelen volcomen
eygendomme van alle den goeden roeren ende onroerende die zij teser tyt hebben ende by successie ofte anderssins noch sullen mogen gecrijgen soe deerstaffly
ninge ongedisponeert metter doot ontruijmen ende achterlaten sal gheen daer van vuytgesondert omme de selue goederen by aduys van hen testateurs zoon
alsdan in levene lyve zynde, ende anders nyet te sullen mogen vercopen beswaeren belasten ende veralieneren, int geheel ofte deel soe den lancxtlevende
in manieren voors goet ende best geraden sal duncken in welcke goederen zy testateurs den dandere lancxtleuende mits des erffgenamen Insti¬
tueerden, willende dat naeden overlyden vande lancxtleuende ende eer nyet de kinderen van hen testateurs ofte hoore kints kinderen inde
plaetse van hooren overleden ouders met een hant inne te tasten, gelyckelyck deelen sullen in alle den goeden die de lancxtlevende van
hen beyden metter doot ongedisponeert ontruijmen sal mits een yegelyck Innebrengende alsulcke penningen in hooftsom als zij hen testateurs ofte
den lancxtlevende, naeluyden zyn ofte haer boeck ofte obligatien in renten ofte anders zullen mogen schuldich wesen, oock wat zy testateurs
hoore kinderen int besteden ofte vuythuwelycken der kintskinderen verstreckt sullen hebben, mitsgaders oock wat zy hen testateurs metschappie
met hoore drie zoonen opgerecht) sullen mogen schuldich zyn naeluyden het matschappie boeck all twelck een yegelyck gehouden sal wesen
inne te brengen voor ende aleer hy inde goederen van lancxtleuen tzy vaders ofte moeders sal mogen eruen ofte inne tasten Des wilden zy
testateurs dat vuyt tgereetste van goederen die Neeltgen egberts hoore dochter van lancxtlevende van hen beyden terue sal mogen nemen ter dispositie
van hen testateurs zoonen alsdan in leuende lyue wesende op renten ofte anders gestelt sullen werden vierduysent gulden namelyck deene tweeduijsent
gulden voor Jannetgen boelen ende dander tweeduysent gulden voor Andries boelenssen des voors Neeltgen egberts kinderen geprocreert by henrick Boelessen
haeren man Ende dit ten respecte vande tweeduysent gulden die zy testateurs den voors henrick Boelenssen verstreckt hebben int vuythuwelycken
van Maritgen boelen Ende dat de brieuen ofte obligatie vande voors vierduysent gulden spreeckende berusten sullen onder hen testateurs
zoonen alsdan In levende lyue wesende waer van donders der voors kinderen dusufruct genieten sullen ter tyt toe de selve kinderen by
raet van hoore ouders ende comen respective gehuwelyck sullen wesen ofte buyten hoors vaders huys te cost mochte gaen, die alsdan ter dispositie
van hoore voors comen de renten selffs zullen mogen genyeten willende ende ordonneren voorts zij testateurs dat de twintich gulden siaers
lyffrenten op hoere thien kintskinderen lyuen elck gecoft opt corps deser stede ontfangen ende genooten sullen werden byde lancxtleuende
van hen beyden ende naeden ouerlyden vande selue lancxtleuende byden kinderen op wiens lyve die gecoft zijn mits dat de ouders dususcit
zullen genieten soe lange ende onder sulcke conditien als hier vooren vande vier duysent gulden gespecificeert staet Ende of yemant van
een gestateurs erffgenamen tegens dese hoore maeckinge, dispositie ende vuyterste wille poochden te doen ofte opposeren by hem selve ofte yemant
anders directelyck ofte indirectelyck, soe wilden zy testateurs dat alsulcke wederwilligen ende opposanten van goeden van hen testateurs offstaen
sullen met hoore legittime ende wettige portie, den welcken zy testateurs in sulcken gevalle daer inne ende nyet vorder tot hooren entfaen
by desen institueren assignerende henluyden in dien gevalle elck voor hoore legittime portie alsulcke vyff duysent gulden als zy elck inghen
lycke gehadt hebben willende dat tgundt den seluen opposanten naeden overlyden vande lancxtlevende van hen beyden, meer soude hebben mogen
competeren sal comen ten profyte van dandere erffgenamen met dese maeckinge te vreeden zynde all dwelck de voors gestateurs ende
elcx van hen verclaerden te wesen hooren testamente ende vuyterste wille, dien zy wilden als alsulcx oft als codicille gifte ter causen dat
doots oft onder den levenden ofte soe dat anders alder best ende vastelicx geschien ende subsisteren mach van waerden gehouden hebben ende
volcomen effect te sullen sorteren, Sonder yemants wederseggen versoeckende hier van by my notaris wettel. stipulerende gemaect te worden
een ofte meer opebare Instrumenten inder bester forme aldus gedaen binnen Amstelredamme ten huyse vande voors testateurs staende
inde warmoestraet genoempt den vergulden beteel int by wesen van Herman Jansz ende Henrick Wybrantsz backers poorters deser
stede, als getugen sonderlinge hier toe versocht ende gebeden, die de minuyte van dese metten voors. Testateurs onderteyckent hebben
Et ego Johannes sylorius notarius publicus pro curiam hollandie devoiatione
oppidi Amstelredammensis admissus, Quia premissis omnibus et singulis una cum
prevocatis testibus presens interin, laque sic fieri vidi et audivi dcirco hoc
publicum instrumentum manum mea scriptum, signo meo consueto signavi in
fidem premissorum rogatus et requisitus,